中女

分手

2010-09-17T19:26:00.000-07:00

不知哪來的勇氣同拍拖八年的男友分手, 明知之後恐怕再沒有男友(因年事已高, 樣子非常一般,工作超忙), 但仍然決定分手, 還用了一個很不好的方法-電郵. 但分手後竟然沒有眼淚, 沒有影響心情, 不禁要問我是否從來沒有愛過他? 八年日子, 從不鬧交, 也沒有刻骨銘心的事情, 是我平淡? 還是我愛得不夠深?

他說從第一天就認定了我, 我則從沒有這種感覺, 反而我為佢的生活、讀書已分身不暇, 是我太自私還是這就是愛情?

加油, 是也!

2010-05-23T03:12:00.001-07:00

不知忙了多少個月, 今天星期天竟然有時間寫blog.

與多年沒見面的中學同學blog上閒聊, 竟然發覺自細給人的印象是靜靜的學生, 無突出表現, 老師對我的存在恐怕也沒多留意.自問從來也不是風頭躉,家悝亦不富有, 故沒多錢參加課外活動, 讀書不好的我亦只有埋頭苦讀, 每天生活只是上學, 回家讀書, 睡覺, 或許是就是這樣, 我的生活變得平淡, 對什麼事也沒興趣。

人生的全部時間也花在工作上….. 相比其他人, 有著自己的生活, 興趣, 真讓我覺到羡慕, 不過, 我也會努力改過…. 加油, 是也!

敗犬女王

2010-05-09T01:03:00.000-07:00

週日晚上機緣巧合看台劇"敗犬女王", 忽然發現女主角的background與我好相似, 當然現實並沒有咁精彩的愛情生活. 女主角有自主經濟能力, 自力更新, 己達中女年紀仍然獨身(但我並不恨嫁), 工作忙碌, 每天加工, 每天早上09xx返工, 晚上10xx回家, 周未周日工作. 於工作中已完全埋沒了自己.

"敗犬女王"其中講到女主角被迫放假, 但竟然放假日女主角竟然不知如何好, 如何打發時間, 對此我很有共鳴, 不知何時開始, 即使放假亦會把時間填得滿, 絕不浪費. 女主角突然驚覺人生不應如此, 最後選擇做實現夢想, 享受人生, 但回想自己, 我又有什麼夢想? 想來想去, 我並無夢想! 這是否意味著我的生活苦悶? 還是我所需已全部擁有 (但我仲未買到車同樓喎!)?

ps 成日想人講話要hea 下, 到底"hea" 是什麼? 'hea'"的時間眼係望邊度? 個腦又諗緊咩?

大陸同化

2010-04-19T07:47:00.001-07:00

老闆突然同我地開會,笑騎騎以為有咩好嘢,原來係叫我地要同大陸同化, 唔好下下都揸正黎做...
我聽完後覺得唔係掛, 同化??? 我係香港人, 點同大陸人呀, 唔係話睇唔起人地, 而係大家的文化, 背景都唔同, 點可能話依佢地的思路? 香港律師點解仲有人信好大程度上係因為我地唔會只聽客的指示, 會識得講'唔好', '唔得', 咁簡單的道理點解老闆都唔明, 只係睇錢??? 唔通大陸人就係咁?!

價值觀被扭曲 (一)

2010-04-19T07:46:00.001-07:00

今年過去如常去姑姐家悝拜年, 探望剛出世2周的bb (由表姐所生, 都唔知係叫咩 hee hee).

表姐與我同年, 父母常把她與我比較, 可幸(不知是否可幸, 詳見下文)憑著一股牛力的我完成大學課程, 表姐自中五畢業開始工作. 雖然讀書方面可能我比較好, 這也只不過是強記死背!但姑姐總是以表姐為傲, 總是讚表姐工作如何地好, 也許就是這樣表姐面上常掛著笑容. 我則埋頭苦幹, 冀望一天得到父母認同.

表姐剛結婚過8月bb出世, 結婚時兩口小子(即使合2人之力)亦無錢置業, 又要工作, 每天都回娘家食飯, bb出世也依靠母親大人照顧,表姐的老公每天到表姐家悝看看bb, 然後一個人回家,不知是我們這一代的問題還是社會的問題, 我們這一代為何自己照顧自己的能力也沒有, 往往要依靠父母, 都底是我們這一代無能還是百物騰貴?

但即使如此要依賴父母, 我見姑姐一家仍然和洽歡樂. 即使我持有大學學位, 但每天工作到死, 仍然無車無樓, 更無人認同, 到底是我太過在意別人的想法還是別人的要求並不高所以快樂還是我們的價值觀被扭曲?

年30 (2010-02-14)

2010-04-19T07:45:00.000-07:00

今年年30晚終於唔係開工, 可以食完飯, 休息下. 係梳化坐坐下突然又思潮起伏, 暮然回首, 好似好耐都冇食完飯坐係梳化與家人一齊睇電視閒談.

自有記憶(小學前的生活完全無記憶), 每天都也是在讀書, 食飯時間為1930, 一般食到2000, 大概可以坐下睇電視到2015, 老豆就問開聲要返房讀書, 所以每天與家人一齊睇電視的時間僅為15分鐘, 日日如是即使放假. (此等生活直至出黎工作為止).

等到工作, 日日都在忙, 放工後仍滿腦子工作的事, 從未有一刻鬆檞, 但轉做corporate finance後, 一件工作接一件, 每件工件都係客戶簽完所需文件就完事, 清脆利落. 除左間中老闆的蠢嘢同senior 的冇理同其他同事的自私, 放工後都冇咩好諗好担心,今年倒是第一年係年30晚可以食完飯係梳化度休息下.

其實看電視倒並不是重點, 重要的要一家人坐在一起, 有講有笑, 電視節目根本千篇一律了無生趣, 但只要一家人齊齊整整健健康康平安的如願足矣!

故事是這樣的 (2010-02-07)

2010-04-19T07:44:00.000-07:00

故事是這樣的 (2010-02-07)

星期六晚係巴士站等緊車, 剛剛有巴士正慶幸可以回家, 不用在街上吹風.突然有個亞裔男士問我: "Are you speak English? Are you speak Chinese? Are you citizen?"

自然反應為"Yes""Yes""Yes"

亞裔男士再問我"there is a boy, I think he is looking for his parents, can you help?"

猶豫了一陣(因為巴士剛到), 最後都決定一同前往.去到地點,見到小朋友臉上掛兩行淚水,看似與父母失散. 蹲下問小朋友, 是不是不見了父母.小朋友看似有點驚. 戰戰兢兢說是呀!

這樣的情況下,唯有報警,全程亞裔男士都在場, 期間同小朋友傾下計, 知道小朋友4歲,讀緊幼稚園, 香港人, 問知唔知父母電話 (小朋友冇答我, 唔知係唔知定係見係陌生人唔講).等了一陣, ,有個女警到場, 問了小朋友的基本資料,並要我提供名字、電話、身分證號碼, 再過一陣, 另外2名男警員到場. 之後, 警方話我同個亞裔男士可以走, 於是又去返巴士站等車.前後搞左45 分鐘.

將整件匯報給媽媽大人, 媽媽大人第一句問, 你係咪俾人呃?有冇問亞裔男士攞資料?有冇抄抵警員號碼? 老實講, 我本來諗住抄低警員號碼, 但回頭望時警員已消失於人群人中.我唔覺得俾人呃,亦冇諗過問亞裔男士攞資料.媽媽大人回應係你自己係律師黎嫁, 點解咁蠢! 下次再遇到的話就同人地講"I don't know!' 原本係一件幫人的事搞到好似係壞事咁....

這件事亦第一時間向男友匯報, 男友淡淡然話下次就叫個亞裔男士報警, 唔到搞到自己啦.
究竟係我唔識保護自己定係呢個世界已變得冷漠?

工作篇一

2009-10-05T07:12:00.000-07:00

今日為工作同男友嘈左一陣... 我明白男友為我好, 但事實上做我地呢行就係要踩著鋼線做人, 如果每件事都可以自己話事或者要等我做到老闆先得...相反地如何個客唔係有嘢搞唔掂又點會肯花錢搵律師吖!

我每次遇到的咁的事, 唯有設置重重關卡, 希望個客可以知難而退, 起碼對於個客黎講我係有俾到意見佢, 致於佢做唔做得我就管不著啦 :) 況且我做咗咁耐應該點做我點會唔識?!

我係受軟唔受硬的人, 你要我聽你就一定要軟攻, 硬攻一定死定! 哈哈!

反醒

2009-10-03T01:52:00.001-07:00

話說上星期有個交易同senior一齊趕於10月1日前簽... 日日做到11點幾有日仲做淩晨2點幾….已經做到好倦好'萌'

有日我與另一個客戶開會, 開會期間, 秘書入黎同我講senior搵我, 我當時唯有同客戶講要出去做點事... 去到senior房, senior話對家已send 了文件過黎, 要我即刻睇, 我同senior講我正與客戶開會, 應該仲有45分鐘就完畢, 完了可以睇文件, senior竟然叫我唔好理的客, 即刻睇文件. 我當時勁嬲, 同senior講我要同的客開會先, senior話(語氣好差)唔得要做佢的order先, 仲叫我prioritise 吓我的工作... 我頭也不回返回會議室...其實大家都知即使我們即時回覆對方, 對方都要大半日的時間先可以再回覆我方, 所以即使等45分鐘對整件事都唔不可補救的後果.

我覺得senior好過份, 佢的客就要做先, 咁係會議室就要等嗎?你的客是客, 我的不是嗎? 難道你是senior所以就一定要做你的order先嗎? 加上我係受軟唔受硬的, 所以當然唔會理佢按我的時間表做事啦! 再者我成日都話如果連自己的事都管不著, 更談不上如何保障客戶的利益!

事後, 我反醒整件, 覺得senior好唔啱, 太自私, 太唔識尊重別人... 但同時我都覺得自己亦有唔啱的地方, 唔啱在未能控制自己的情緒,未能做到喜怒不形於色, 反正我都唔會理佢, 咁又何需同senior嘈呢?!

後記：聽說senior對自己的家人也是一樣, 常常發火鬧人, 就連前兩間的律師都聽到(當然公司的隔音相當差), 真的不明白senior的EQ為何如此的低?難道senior一點也不担心他的仔會同佢一樣待人?難道現世已沒品德?正確待人接物態度可言?

我的問題還是太執著?

2009-09-26T06:38:00.000-07:00

舊公司的trainee (現在已是律師)Ms. C告之其剛完成法律援助署final in(應該成功機會很高), 其投考此職主要佢覺得現在公司人工低沒有前境... 我曾與Ms. C共事, 離開公司後仍保持聯絡.不知是否要求過高, 我覺得Ms. C很多法律程序都唔認識, law concept就更弱.完全未能獨當一面(連去差館都唔識),但同時Ms. C要求公司可以給予市場價. 這樣的質素還要求公司給予市場價?我真係唔覺得Ms. C有做律師的材料.唔通因為佢是香港大學畢業(自以為英文好好之外),就可以有咁的待遇?

Ms. C話我知佢申請法援署做律師,佢話我知係公務員.我話去到我而家呢個階段唔會考慮申請做政府律師(除非律政署), 而且我怕係政做會悶到發慌.... 我話我地咁辛苦係private practice 得到的經驗會漸漸 fade out. 或者人地覺得冇問題, 但我覺得好有問題, 讀law(或者每一個專業)係要不斷update自己, Ms. C 就話佢會考慮讀LLM, 我自己覺得LLM只不過多一個銜頭, 並無實質的知識, 而且LLM讀的都已經係晒本書度啦, 反而有時客的機關算盡就並非書本上可以學到... 所以我暫時唔考慮讀LLM. Ms. C聽咗之後好似明我講咩咁... 咁我問佢點解佢要申請法援署,佢話主要係貪呢份工人工高冇咩做... 我係度諗冇嘢做的工會好悶, 而且冇嘢做會搞到自己的Legal skills 無晒.無晒競爭力, 咁的生活點過? 如果有朝一日要出返做private practice仲邊度會有人請你? 我亦有的同學係一間law firm做成世, 咩law都唔識,連寫封信都達唔到好的律師的標準, 呢啲真係法律界的恥辱! 點解讀左咁多書都咁冇腦?!

Ms. C話按我的諗法要不停進步, 會好倦... 我心諗要保持競爭力就要咁嫁啦, 唔可以'hea'過世, 浪費父母納稅人的投資... 人人都識的Legal knowledge公司做咩要請你呢? Ms. C話佢有個同學係法援署過著'hea'的生活, 不知幾享受, 我的回應係如果注定要過一的'hea"的生活點解仲要咁side錢讀law? 這樣的人生有意義嗎? 呢的人係不知天高地厚, 有很多人很希望有讀大學的機會以脫貧, 點解有這樣人浪費這樣的機會?

Ms. C話佢申請法援署做律師另一個原因係因為人工高, 開始係4x,xxx, 升到盡就7x,xxx, 我同佢話或者開始一刻係高人工, 但或者始終係private practice會高啲, 何況對於我地呢的唔係豪'洗'錢的人黎講, 5x,xxx或者7x,xxx分別唔係咁大都係數字遊戲唧! (男友又話我唔識計數... :( )

最後我向男友高談我的'偉論', 男友一語道破: 我唔抵得咁的質素可以做到政府工, 反而我的默默努力就冇人知..... 男友仲提醒我唔好成日與人比較... 或者我自幼父母把我與姐姐比較(當然我是被比下去, 按老媽說姐姐年幼聰明可愛, 但我就心散讀書平庸), 所以我唔鐘意比人落後比人差...
這到底係我的問題還是我太執著?

錢的概念

2009-09-01T22:14:00.001-07:00

唔知道係我的數學唔好(男友一直投訴我的數學差到無人有), 定係家教的問題, 我對錢一向都冇咩概念. 只要負擔得起就得, 好似堅持如果可以一年最少一次旅行, 得閒就買下衫俾老豆(一次大約買1500蚊, 高峰時差唔多每3個月買一次), 買下心頭好, 好似iphone (雖然我只係用係聽電話同聽歌),買royce chocolate 俾老媽子(每次70蚊, 一個月平均買一至二次), 兩老生日食餐好的(平均3000), mother day 同father day 去下飲荼買旦糕, 男友特別反對我買70蚊包的royce chocolate , 佢話貴得離譜, 我就冇呢種感覺, 當然我知係比一般的貴, 但我覺得如果老媽子食得開心品質又的確係好的話, 我真係冇所謂. 男友成日話我唔明我點解要celebrate mother day 同father day, 兩老生日又要上館子等等活動, 其實某程度我係想有的回憶, 起碼等兩老生仲行得走得去多的地方睇下, 希望佢地會開心的(雖然唔知實際佢地係咪真係想去旅行).
久而久之, 我發現我儲錢的速度好慢, 因為定時定候要交稅, 交保險, 唯有向自稱數學了得的男友求救, 男友話我冇錢的概念.... 但錢的概念又應該係咩?好似我家姐咁'只'洗'係自己身上, 其他人就一毛不拔'?

多心?

2009-09-01T22:13:00.004-07:00

不知係我多心還是性格使然, 每遇到家中兩老打電話不通又夜夜未歸總會憂心忡忡,怕發生了什麼意外,到底係我諗得太多還是此乃正常現象??

多餘?

2009-09-01T22:13:00.003-07:00

昨日諗住可以偷閒一下可以早的走,點知都係成5點先走人(原本係3點走), 仲要攞左一大堆工作回家, 仲要全日都冇時間食飯.回家途中打電話返屋企, 查察一下家中兩老的情況. 老媽子例牌話我又唔食飯 :(
一心諗住係回家前買少少嘢食醫下肚先, 跟住食完晚飯繼續開工. 點知當我尚有5分鐘路程老媽子打電話話今晚唔煮飯, 查問之下, 原來老媽子要去salon整頭髮.事緣老媽子前星期去完電髮對效果甚為不滿,終於老媽子忍無可忍要再去salon要佢再整. 聽罷我問老媽子salon係邊(驚老媽子唔識路), 好彩係屋企附近, 老媽子提議一齊去salon... 其實我已經好倦, 個袋仲袋住的很重的文件... 但又担心老媽子一個人搞唔掂, 但如果同老媽小一齊去salon即係話又要做嘢做到1200點幾,思前想後,唯有拖住極倦的身體與老媽子同行.係老媽子洗頭期間抽空打電話俾男友, 男友又話我點解要陪老媽子,特別係佢知我嚴重欠缺休息而且當時仲未食飯.我只有答佢, '以前我小學時老媽子帶我去剪頭髮, 咁到我大個咪我帶/陪老媽子去salon, 好正常唧'
其實我係咪有啲多餘? 老媽子尚未老到話自己照顧唔到自己, 有冇我一齊去佢應該可以搞得掂,而事實上我家姐就對老媽子的情況一點兒也不關心(或者應該係話佢對家人的情況漠不關心), 反而我事事關心, 或者終有一日我會捱唔住..因為實在太多事我要掛心. 但我又相信係呢個世上係有人好似金庸筆下的黃蓉咁可以面面俱圓聰明絶項!只係能有黃蓉的能力非人力可為...

親人

2009-09-01T22:13:00.001-07:00

自細授父母教導相信'你對人好, 人地自然對你好', 所以只好我只覺得你係好人, 我一定傾囊相對。就好似circule of trust, 只不過我的circle of trust 好算幾容易入。當然如果我認為你係一個唔好既人，例如人品差(我都知呢樣就幾個人判決)，我就一定會鐵一般轟你出去我的circle of trust (或者你根本無入過circle of trust)! 可能呢個概念實在太幼稚,剛剛家中發生喜事,父母同親友接觸多了, 竟然發現被親友利用當為羊'古'。實在百思不解, 竟然有人會有人如此對人, 仲要係親人真係難以致信！
更想唔到係母親大人竟然解說親人行為為'聰明、厲害', 我身為律師遇到的不同的人, 遇到有知識但無良的人或無知識無良的人或機關算盡的人多的是，親友的行為怎麼也算不上係'聰明、厲害'；我最遺憾的此人與我同齡，如今落得如此低劣品格實在浪費納稅人金錢，父母對她的愛護！

一個人

2009-09-01T22:12:00.003-07:00

竟然要一個人係公司由早0830做到第二日的早0600時...唉,唔好以為係因為的咩大單嘢, 只係一間間小型上市公司.用人唔使本,都唔理人地工作休息時間.我都明如果真係趕的話, 我一定會留, 但明顯地係冇咁的需要.早係佢地定時間表的時候, 我已經同佢佢地講原則上咁的設計係行得通, 經驗話我知咁趕係冇可能, 仲要有咁多個party..的auditor的數又成日改.. 但個客都無理只係一味按自己意思做.. 唉無計啦, 呢的大陸人... 都唔係文明人, 加上而家咁的時勢我可以點吖
只希望老闆知道呢的客真係唔要得, 第一我地收fixed fee, 做咁多嘢花咁多時間都係收多錢, 第二, 大陸人好野蠻, 老闆應該係搵的客肯俾錢, 又或者老闆可以收番合理的費用, 而家咁做仲差個mcdonald.
最慘係公司冇人可以幫到手, 其實同事冇責任, 冇帶個腦返工, 但同時老闆又請左的人唔使用... 真唔公平, 奈何又未搵到好工.. 點算...

senior

2009-09-01T22:12:00.001-07:00

senior成日發火又成日話唔難的既都唔俾佢做...
我心諗你係senior, 收咁高人工, 唔通做我做到的嘢咩.. 如果係, 咁請我就得啦, 唔使你啦. 所謂食得咸魚抵得渴, 你成日咁火叫人點同你一齊做嘢? 仲有你的屋企人, 叫你的屋企點同你生活呀!
senior, 好心啦, 你都幾十年歲人, 有咩未見過, 點解的修養會咁差呀! 我以為堂堂一個去過外國讀書, 係大行做過的律師會係咁... 如果唔係我哋呢間行人小小, 老闆又好人, 你又點會咁座大? 人人都怕左你呢? 因為你公司已經換左幾多個秘書?點解你唔會諗下到底係邊個的問題? 雖然話我哋呢行係一個lonely 的profession, 但唔等如應該無個人修養..

自由活動時間

2009-09-01T22:11:00.004-07:00

雖然每日正常返工時都忙, 而且每日都睇住個鐘搭船, 呢幾排唔算太忙, 近排仲可以返到屋企食飯tim.以前做litigation時, 放工之後個腦都仲諗住file. 但而家食完飯無咩特別嘢做又覺得幾無聊,食完飯2個鐘度又要準備'訓'覺, 雖然話有返的自由時間, 但日頭做嘢都幾倦都冇精神做的heavy既嘢, 但時間係咁過又真係幾無聊!人真係好矛盾!
但同時又見到不論年紀的同事(由老至嫩), 都不停進修, 又話讀llm, 又話讀日本.. 唉我覺得讀llm, 除左可以brush up 個cv, 但實際用途真係無.. 如果話可以保住自己的競爭力, 咁就自己呃自己... 競爭力係睇自己, 點可以只睇一個學位? 唔好傻啦! 成熟啲唔該! 咁到底自由時間應該做的咩係最適合呢?

辭職=唔使做?

2009-09-01T22:11:00.003-07:00

剛剛知道公司有個同事辭職, 似乎不歡而散.我當然好同情我同事的情況,但佢的行為又真係好過分.
自從佢辭職之後就所有工作都唔做, 日日係自己間房度唔知做咩.. 有case想搵佢做, 佢就推job, 我心諗你一日收緊公司的糧就要做嫁啦.一句話辭職就咩都唔緊做, 你咪好著數.最慘係佢覺得推job係好應該o既, 但其實我蝕低既都係你自己, 第一, 你咁既工作態度, 叫人點請你呀! 呢行好咁細...
第二, 你點都要係度返工直至最後一日, 如期坐係度不如做多的嘢學多的嘢...
唉, 我都唔明堂堂一個律師會咁做嘢, 讀咁多書但個人都無進化過...

無題一

2009-09-01T22:11:00.001-07:00

不知幾時開始,每天都打電話到家裡看看家裡的情況.開始的時候可能係做嘢做得悶悶地想做下其他嘢等個腦可以休息下.而家就做成習慣,妤似的要返工的阿媽有時間就會打返屋企check吓的小朋友的情況咁.
雖然阿媽唔算年紀很大,但有時都怕佢係屋企唔知會唔會有突發事... 好似昨日咁, 真係好忙, 到5點幾先有時間打返去.. 老豆同我講話阿媽唔舒服(唔算係大件事), 個心都會想即刻返去,雖然唔講得上話陪佢, 但始終有個人係度想飲杯水都容易的...
好彩返到屋企, 見佢冇咩事都算放心... 可能會有人覺得我婆'那'咗, 擺明唔係咩大件事, 如果真係大件事我老豆一早打咗電話俾我啦, 但係始終都係早的返去睇下會好的, 又或者我係女的關係, 知道阿媽以前湊我好辛苦所以而家少少事都會全力以赴做到最好,但我見到我家姐的態度就真係好唔明. 佢一返到屋企見到我買左外賣,竟然第一句問'今晚冇飯食呀?', 佢當時只係係門口, 鞋都未除, 一句都冇問點解今晚會冇煮飯.我唔期望佢會好似我咁日日都打個電話返屋企, 但我會覺得基本的關心係應該有, 老豆同阿媽投資左咁多時間心機係我哋身上, 又唔講嘢到可以自己照顧自己, 呢的心機同時間都係無得回報, 點解有啲人可以咁冷漠?定係我誤解左佢?我真係唔知道....

釣魚

2009-09-01T22:10:00.001-07:00

公司原本有2個ts(而家都係律師啦), 其中一個家中好有錢, 但所有人都覺得佢做嘢唔掂, 話佢冇用腦又唔係, 但佢做嘢真係好唔認真. 成日做嘢講嘢都唔經腦.. 日日見佢係度傾電話睇名牌網站, 都成30歲個人一啲內涵都冇無, 成日諗住點轉去的大的firm, 唉, 你咁冇料點係大firm做啦, 當然唔排除你可以用其他方法survive...
對住佢真係好無奈... 作為比佢年長的同事, 當然希望佢可以幫到手, 減輕下大家工作量, 但每次都係失望.佢成日覺得我地俾佢做的嘢係的冇謂嘢, 但回心諗下, 連的所謂冇謂都做唔到, 你都唔好要求人地俾的所謂深的既嘢你做啦. 而且我認為工作唔認該分有謂定冇謂, 呢的咁的態度真係唔要得.
最慘佢一有問題就諗到唔諗走黎問, 我覺得點都應該自己睇下書先, 然後先同我討論, 唔係奉旨我地俾答案, 我地亦唔係樣樣嘢都識呀! senior曾經講過, 如期每次俾條魚你, 倒不如教你點釣魚, 咁大家先有進步. 我好同意, 但對住佢真係冇能為力.

自律

2009-09-01T22:08:00.000-07:00

作為專業人士, 我個人認為應有自律-守時. 但唔知點解咁難做到...
只係返工時間, 我都唔明點解明明話要係係9點半前返到,可以搞到10點或者11點有時會係12點.問佢點解咁遲, 佢話因為前日做到好夜.但你又唔諗下, 你做得咁夜係因為你遲返工, 所以咪搞到咁遲囉!
就係因為一個律師咁無時間觀念, 搞到老闆要實行簽到.我做律師咁耐都試過話要簽到, 仲慘過小學生... 不過要簽到又點, 咁又係10點幾先見人, 都唔明點解咁大個人仲要係作為律師連守時咁基本的嘢都做唔!
就係因為一個律師搞到的人無晒規舉, 而家連其他律師秘書都係咁, 無人準時返工. 但老闆又咩都唔做, 我又唔想同流合污, 真唔公平!